Pisortaqarfinni soorlu kommunini, Namminersorlutik Oqartussani, Naalagaaffiup suliffeqarfiutaanni ingerlatsinerit kiffartuussinerilu aningaasaqarnikkut inissisimaffiat kisitsisitigut paasissutissani matumani ersersinneqarput. System of National Accounts 1993 (SNA 93) aamma Det europæiske nationalregnskabs-system 1995 (ENS 1995) nunani tamalaani nuna tamakkerlugu naatsorsuusiornerni atorneqartartut malillugit kisitsisigut paasissutissat suliarineqarput. Taamaaliornikkut nunanut allanut sanilliussisoqarsinnaanissaa qulakkeerneqarpoq. Taamaakkaluartoq nunanut allanut assingusumik ineriartorsimasunut sanilliussinissaq pingaaruteqarpoq. Saqqummersitami uani Kalaallit Nunaanni 2021-miit 2025-mut pisortat aningaasaqarnerisa ineriartorsimanerat takutinneqarpoq.
Saqqummersitaq pingasunut immikkoortinneqarsimavoq, immikkoortut imaluunniit saqqummersitaq tamakkerlugu atuarneqarsinnaapput. Kapitalini 2-5-imi pisortat ingerlatsinerat kiffartuussinerallu ataatsimut isigalugu, kommunit, Namminersorlutik Oqartussat, aamma Naalagaaffiup Kalaallit Nunaanni suliffeqarfiutaasa aningaasatigut ingerlaneri takuneqarsinnaapput.
Kapitali 6-imi kisitsisitigut paasissutissiornermi najoqqutat sammineqarput, kapitali 7-imilu taaguutit aamma nunani tamalaani malittarisassat atorneqartut sammineqarlutik. Taakkununnga ilanngullugu tabelit saqqummersitami ilanngunneqarsimasut sammineqarput, pisortat aningaasartuutaat aamma isertitaat takutinneqarlutik, taakku nuussinernut (aningaasarsiorneq tunngavigalugu agguataarlugit) siunertanullu immikkoortillugit (suliat tunngavigalugu agguataarlugit). Immikkoortumi taaguutit aamma najoqqutani immikkoortiterinerit marluk sammineqarput, ilaatigut COFOG, Classification of Functions of Government-i nutaaq itisilerneqarluni.
Saqqummersitaq tabelinik kapitali 8-mi naggaserneqarpoq. Kapitali 8-mi tabelit takussutissianut kapitali 2-5-imiittunut sukumiinerusumik itisiliipput.
Kisitsisaataasivimmi bank.stat.gl-imi 1994-imiit 2025-mut kisitsisitigut paasissutissat sukumiinerusut elektroniskinngorlugit pissarsiarineqarsinnaapput.
Saqqummersitamik
iluarsaassineq
Kisitsisit 2024-moortut saqqummersitsinermi matumani iluarsaanneqarput.
Naatsorsueqqissaartarfimmit Nunap Karsiani naatsorsuutini inissititerinermi, Kalaallit Nunaanni Meeqqat pisinnaatitaaffiinut sullissivimmut (MIO) ingerlatsinermut aningaasaliissutit, iluarsiivigineqarput.
2026-mi septembarip naanerani pisortaqarfiit ataatsimut aningaasaqarnikkut ingerlatsinermi atortorissaarutaannit kommunit naatsorsuutaat tiguneqarput. Piffissamilu pineqartumi ukiumut naatsorsuutit 2025-moortut Avannaata Kommuneanut, Kommune Qeqertalimmut aamma Kommuneqarfik Sermersuumut suli inaarutaasumik akuerineqarlutillu saqqummiunneqarsimanngillat. Taamaattumik 2025-mut kisitsisit kisitsisaagallartutut atorneqassapput.